【盘房来料】腾讯回购多日亦顶唔住放大图片

唔知侵侵係咪为咗转移视线,希望市场唔好太注意美国众议院动议向其启动弹劾调查,所以喺中美贸易谈判前发表强硬言论,更进一步将香港问题跟谈判綑绑埋一齐,拖累隔晚美股下跌,道指更曾挫逾二百点,虽然埋尾道指跌幅收窄,但三大指数齐齐下跌。港股噚日回升,但都讲咗弹力欠缺力量,兼且恒指企唔稳26300-26400的话,后市都係瓜多过菜。

恒指低开118点后持续向下,跌幅一度扩大至355点,见过半日低位25925点,创9月4日以嚟低位。其后有消息指中国将扩大向美国购买猪肉,大市跌幅一度收窄至90点,见过26190点半日高位。可惜今日似乎26200点又係阻力,半日仍跌逾200点,幸而二万六关失而复得。恒指半日报26031点,跌249点;国指报收10193点,跌77点。

重磅蓝筹股普遍向下,大笨象(00005)因为美债息回落脚软,友邦(01299)长线再睇好,但短线股价受压,由于係指数重磅股,呢期个市弱到咁,友邦亦唔慌有运行。至于连续多日回购嘅腾讯(00700)亦唔顶得住,已连跌八个交易日,连330元亦失守,短线一旦跌穿320元真係无眼睇。其他重磅股一样有神无气,大市当然撑唔住。

继苹果及华为发布旗舰新手机后,小米(01810)亦已发布新手机,价钱高得吓人,可惜惊喜欠奉,而贸易战再度升温,手机股威咗几日,今日又捱沽。整个板块股份无一倖免,只有比亚迪电子(00285)逆市升0.7%,其他跌幅由0.8%至3.4%不等。

内地药品带量採购由「4+7」试点扩至全国,结果将陆续公布,噚日下午医药股纷纷反弹,以为有係春江鸭水暖先知,点知一下急抽后,稍有消息公布,今日药股又回复跌势。不过对于呢个板块嘅前景,阿Man仍然睇好,只係目前大市整体气氛麻麻,医药股今年之内累积升咗咁多,高位难免有沽压。

讲番个市二万六呢个位真係危危乎,况且亦唔係乜嘢支持位,暂时指数短线支持位喺25800,失守将下试25300甚至24900点,至于个市能否摆脱困局,要先睇26300-26400呢个关键位,呢个位一日未能收复兼企稳,个市都唔会有运行,只係周五期指结算,断估呢两日仲会顶番两吓头鎚,大户托住指数部署下月仓位。

麦狄文
(徐狄怡‧证监会持牌人)